偶看新闻分贝的意思:话“搭”
来源：百度文库 编辑：偶看新闻 时间：2024/05/05 20:11:14
看到面熟陌生个朋友，搭伊讲闲话是有搭无搭搭搭看，勿晓得啥辰光啥人搭桥认得个，反正是瞎七搭八搭几句。听听讲讲上海闲话，想勿到迭个搭字用了蛮多个。搓麻将叫麻将搭子，舞台浪叫舞搭子，生活中看到老人掼拉地浪向可以搭把手扶伊起来，不过现在要搭迭个手，一定要了解一眼知识，勿然搭老了就讲勿清爽仔。
小辰光大人带阿拉去医院看毛病，医生要帮阿拉搭搭脉，一搭脉伊拉就晓得阿拉是生啥毛病了，出了医院门搭公交车，上车看到老年人还可以搭把手。读书辰光看到零食就想搭搭嘴，馋痨胚就是迭个辰光养成个。想想当时读书成绩太搭浆，一放学就跟同学出去白相游戏，常常拨了爷娘搭牢，讲我脑子搭错了，勿好好交读书，一日到夜垃拉外头瞎搭八搭，要我放学早一点回去，帮爷娘家务事体搭搭手。每到放假阿拉顶顶欢喜帮老师一道搭舞台，帮同学做搭档立拉台浪向搭七搭八讲独脚戏。有辰光想让比阿拉大一眼同学帮忙搭搭脉，想勿到伊拉还要搭架子。工作以后同事看到阿拉年龄勿小，一日到夜要帮我搭搭桥介绍女朋友，常常看中个女朋友就是搭勿上，连搭讪个机会还勿肯拨阿拉，后首来再晓得伊拉勿欢喜阿拉勾肩搭背迭个小动作。平常里七嘴八搭惯了，有辰光勿看山水。现在阿拉出门搭飞机，搭轮船，搭差头，还可以搭搭邻居个自备车，随便阿拉垃拉网络里搭进搭出，穿个是马甲也呒没人晓得阿拉是啥人。啥个诈骗电话，网络骗子想骗阿拉？伊搭也搭勿牢阿拉个边。
话“搭”，想勿到一搭搭出介许多，其实阿拉就是上海人讲个百搭，随便啥事体阿拉是万宝全书缺一只角，搭来搭去就是为了大家开开心心，生活当中还勿好缺阿拉可以搭进搭出个“老百搭”，不过阿拉随便哪能介搭，只要神经呒没搭错，就勿会拨派出所搭进去。上海闲话中一定还有交关跟搭有关个闲话，新民夜报开上海闲话专版，帮阿拉读者搭讲上海闲话搭桥，勿管侬是老上海人，还是新上海人，想搭就搭上来，大家搭搭白相，搭出花样百出闲话来。